زولاً أنا
زولاً بدافر في السكون
يجبد يقالع في الحنين
ساكن مع الروح في الفؤاد
يفتح مداخل للفرح
.ويمسح دموع خد الحزن
...يشهق معاي زي النفس
.نتنهد الاحلام سوا
ويقنت معاي ساعة الزعل
زولاً بيشبه كل شي
فيني وجواي
.زولاً أنا
يغشاك يزورك زي منى
ويقعد يقاسمك فرحتك
ولو مره هل عليك ضو
بيشلع ينور فجتك
بنزل عليك شايل المطر
وتبتق الاحلام جواك
وتفرهد الازهار
عشم في سكتك
زولن مواسم للسنين
فرحانة بيهو ألازمنه ..
.زولاً أنا
و لومرة يوم في يوم بعد
زي الضفر لمن يفارق للحم
ولو حن يوم وعليك دنى
بتحسو جواك في العروق
شريان ودم
.زولن بيسكت لي الحزن
لو مره يوم حاكاك نضم.
مسمار قلب ترياق صباح
..رجعة نفس جوه الضلوع
بهجة عيون بيهو انشراح
تتهنى بيهو جمال حضور
لو مره زار الامكنه...
.زولاً أنا..
زولاً بيمسج جبهة الفتر
القديم من التعب
زولن يدلك للفرح لو الدروب
صبحت ضهب
زولن سمح في كل يوم
لما الزمان يصبح كعب
.تضحك تحسو بيشبهك
تفرح توالفو بلا سبب..
زولن جواي مكتوب اسم
وحروفو فيني معنونه.
..زولن أنا
زولن لمن يغيب بتحسو فيك
.وكل الخلوق بتشوفو فيك .
وتلقى كل الكون يأنسك ويشتهيك
لانو فيك .
زولن وكت ماتفوتك الاحلام قدر
تلقاهو مكتوب قسمة ليك .
بيملاك تب لمن تدفق وتكتفي
.بيقدر يسد كل الفراغ العاطفي
يخليك وسط الناس حضور
لو انت مافي والا..في
بيطمح بحور بالبهجه
والريد والهناء
...زولن أنا..
.. زولن يخاصمني سماح وريد
...زولن وكت مايفوت زعل
يمنحني بيهو فرح جديد.
ترقص بتضحك لي السنين
لمن تهل ايامو عيد
...زولن فراقو يوم ماكان فراق
وغيابو دايما شوق شديد
وانا بيهو بتنفس وفاء
مطمنة ومتيقنة .
.زولن انا
صباح محمد الحسن
ليست هناك تعليقات:
إرسال تعليق